أنا: "غريبة سهران وجادع الغترة وفال الشعر يا مطفوق وما عندك طاري تمشي مثل العادة، وش صاير؟ عسى مهيب أم العيال مسوية لك نفي أو تهجير أو حظر منزلي؟!
مطفوق: والله معك حق، مهيب عادتي أسهر، بس الليلة أم العيال رايحة لحفل زواج قريبتها وما راح ترجع إلا محاري الفجر. وعلشان كذا أبغى أسهر الين تكلمني واروح اجيبها".
أنا: يا مطفوق عندي انطباع معاكس للسائد.
مطفوق: كيف؟!
أنا: "دائما يزعجونا بحرية المرأة وإعطائها حقوقها بينما أرى أن المرأة عندنا ماخذه حقها، وأرى أن على الرجل أن يطالب بالمساواة في الحقوق مع المرأة، فالرجل مسكين قوّامٌ، كدّادٌ، صرّافٌ، سوّاقٌ، والمرأة مجرد جنس لوّامٌ، نوّامٌ، عدّادٌ بدّادٌ ".
مطفوق: "وازيدك من الشعر بيت، فالمرأة عندنا ترفه عن نفسها في حفلات الزواج التي فيها طرب وغناء ورقص وفرفشة وليست مثل حفلات زواج الرجال والتي كأنها مجالس عزاء أو مزارع تعليف وتسمين، ما فيها إلا العشاء، كأن الناس في حالة فاقة ومجاعة. ياخي الرجال لهم الحق في الترفيه يبغون طرب ويبغون سامري ومزمار وعرضة، يبغون يحسون انه فرح وسعادة، مهوب زي ماهو حاصل الآن في قاعات أفراح الرجال تلقاهم صافين على الكراسي كأنهم في لمحطة اتوبيس. أو كأنهم في محاضرة قد ران عليهم السكون ولا يمسون الحصى، بصراحة حفلات زواجات النساء مليانة بالفرح والسعادة.. هل تصدق إذا رجعت زوجتي تقعد تسولف علي ساعة ونصف وأكثر، وإذا نعست كلمت اختها، يسولفون ويحشون مع انهم كانوا في العرس سواء، لكن لازم من الملاحظات.. وش رايك في تسريحة فلانه.. وشفتي عقد سارة يلمع من أول الصالة.. وش تقولين في فستان ام فهد، بصراحة ستاي.. بس موضي ما عجبني لبسها مشخلع بزيادة، بس وش زين بنتها، تصلح لأخوك بدر.. حتى بنت ام تركي حلوة بس عيبها ان فيها موقة زايدة وقصة شعرها (بوي) ما حبيتها.. ما علينا منهم ورا لطيفة مبهذلة على غير العادة.. شكلها ضايق صدرها من ابو صالح، دايم تشتكي منه مع انه حبيب ويقدرها وفارش لها الأرض حرير، لكن بعض الحريم ترفس النعمة برجلها.. شفتي بنات آل فلان منعزلين وقاعدين لحالهم وسواليفهم بينهم، كان قعدوا في بيتهم أحسن ما دام ما يبون الناس.. بس يازين رقص بنتهم نورة يهبل، ما شاء الله، تكتكت ملح وش زين نفسها.. حركات خرشت الصالة.. وراهم ما جابوا المطربة أحلام ماهم قايلينه.. وقفت على المطربة نواحه، بس الصدق وش زين حطهم وتشريعتهم وعشاهم.. وكوشتهم ما شاء الله، كل شغلهم زين.. عقبال سهى وندى وحبايبك".
أنا: "فش..آخ.. خرررر".
مطفوق: "قم جعلك النعاس.. أردى منك اللي يتحمس ويسولف عليك".
