قوم قوم يا أبو أحمد اسمع الأخبار، يعني فيه أيه يا أم أحمد، ما هي معروفة هذا انقتل وهذولا مصابين وسونامي ومصايب كورونا وعراك لا ينتهي بين بعض النقاد الرياضيين والمحللين السياسيين وهلم اسحب.

أولا ياراجل هي هلم جرا مش اسحب، ويعني انت من فهمك باللغة العربية. وبعدين أنا غلطت في البخاري يا ستي. وقومتيني من نومة العصرية. الله بس يعين عليكي ياشيخة.

هيا ايش الأخبار اختصري. يقولوا وقفوا تأشيرات السواقين والشغالات خلاص بح، تقوم بنفسك تشرب موية تكوي حوايجك تغسل سيارتك. اوف من جدك والله دي مصيبة. والأولاد يا حبة عيني تعودوا على الشغالات. حتى كاسة الموية ما يجيبوها. واستني بس تكة ويقولوا للشغالة شربيني الموية. طيب بالله عليكي من جد الكلام هذا. ردت أيوه بس ما شاء الله عليهم. ما خلوا لاحد عليهم باب ولا شباك. تقول الأخبار إنهم اتفقوا مع شركات تصنع ربوتات. شغالات وسواقين وطباخين ومن كله.

ويقولوا كمان إن البضاعة وصلت الميناء. لكن لازم يكون عندك تأشيرة عشان هم يعتبروهم بديل عن الأودام. من عقلك الربوت هذا راح يعرف عاداتنا وتقاليدنا. أيوه معبينه قصدي برمجينه على تقالدينا لا تشيل هم. طيب أجل التأشيرة بخليها مسلم. يا خويا هذا جماد وما بينهم فرق. المهم يجي سرانا بسرعة. هوا في سرا كمان. أيوه بس أسرع من أول وكل شركة استقدام لها حصة. يعني ما منهم فكة ورانا ورانا.

طيب أنا رائح أسوي الطلب. وأقدمه ونشوف كم شهر لين يوصلوا واستنى يا اكديش حتى يجيك الحشيش. ما فلحنا مع بني آدم حتى نفلح مع الربوتات. يا اخويا أولا هدولا من المصنع ويقولوا إنه باليوم يصنع الآلاف أشكال وألوان.

على فكرة حط في الطلب يكون لونهم زي لون نادينا. عشان الأولاد يفرحوا وكمان نكايد جيراننا. وكم تتوقعي يكلف الربوت الواحد. ترد عليه شوف الواحد يكلف 20 ألف ريال 15 ألف للشركة و5 آلاف صيانة وتنظيف. اف يعني ايش ما يصير خراجنا لهم. على قول المغني وين بتروح والحبل مزرور.

«وبعد كم يوم». يا أبو أحمد أنا صراحة بدّي أزغرط وأنت نايم جات سيارة لشركة الاستقدام نزلت روبوتين سواق وشغالة زي القماري. وأعطيتهم الغرفة اللي فوق السطوح. رد أما غريبة وكيف تحطي حرمة ورجال مع بعض وكمان زي القماري. ترى هذا اختلاط عيني عينك. يا خويا دول حديد مش لحم ودم. بعدين ترى انت زودتها بحكاية الاختلاط هذا. يلا المهم يا رب يعرفوا شغلهم.

«وفي الصبح». هيا يا أبو أحمد راجيف في غرفة المستودع قوم حط زيت في ركبه. كيف هذا اللي باقي! وبعدين ايش اللي رجع راجيف؟ مو قد سفرناه. ومين اللي دخله بيتنا؟. يا خويا هذا الروبوت لأنا والبنات سميناه راجيف على اسم السواق اللي كان عندنا. طمنتيني حسبته رجع. ويبغي كمان أحط له زيت في ركبه وما يبغي كبوس حضرته بالمرة. هيا بلا تريقه البنات جاهزين ولما طلبوه يوصلهم ما قدر يمشي. طيب وليش الشغالة ما جابت لي الفطور. هو لو بناتك فيهم خير كان استغنينا. يعني هم بناتي لحالي. أنا حملت وولدت. وأربي وأنت في النهار شغل وفِي العصر نوم وفِي الليل بلوت. يب وأنت كمان في النهار يجوكي صاحباتك وبراد الشاي والكربو والحش في عُبَّاد الله. وكل ليلة خرجة. شي فرح أو ملكة أو جمعة ستات. وكمان تبغي تتوظفي وتخلي الأولاد للشغالات. والآن للربوتات.

المهم أيش ما نسوي تبغوا تسوا زينا. ترد أقلك على كدا ما راح نخلص المهم ترى الشغالة يمكن تتأخر يا خوي لأنها قاعدة تنشحن. ليه هي جوال أول مرة أسمع شغالة تنشحن. أنت نسيت. مو هي ربوت يا أخويا على الكهربا. والله الشغلة ذي ما هي راضية تدخل دماغي. طيب أيش سمتوها. ترى لعلمك سميناها في في على اسم أمك. والله عال ما التقيتوا إلا اسم أمي. وليه ما سميتيها على اسم أمك أِنت جي جي يعني جينات ومدري من فين جابت الاسم هذا مع إن جيناتها الله بالخير. لا يا خويا اسم الله على أمي اسمها حلو وشكلها والله زي الفل وأكيد جيناتها عسل. طيب قصره روحي شوفي الشغالة انشحنت ولا لسا. وأنا رائح أزيت ركب البلية راجيف. عسى ما يرفسني. قال أيه جبتك ياعبد المعين تعينني لقيتك ياعبد المعين تنعان.